Mai sang hong piang pheang tu thu a son khol thei bei-din syate, hunthak prophette sia, mihing te up thathei tu, mihing te thin sungah a thuson uh thute a kip top tu in son thei, thiam thei mama hi. Ahihang abosa hun thupiangte hoi tatak en kik leang bei-din sayte, hunthak prophet tam mama te ii thu son khol thute piang siat ngawl, a khial tam mama ci thu kimu kik thei hi.
2007 kum January 4 ni AP news sungah Jane Doherty a kici numei khat ii bei-din suak hi. Ama thuson kholna sungah Hollywood actor Brad Pitt le actress Angelina Jolie te 2007 kum bo dong nupa kikhen ngawl tu hi ci son a, man mama bilbel hi. Ahihang 2007 US president election ah New York governor Rudi Gulianni sia Republican sangpan hong ka tu hi ci a son khol thu le, Obama sia 2007 kum bo ma, president kidemna pan tawlnga tu hi ci a son khol te khial citak khial ahihunlam tu ni ki tel hi.
Sylvia Brown a kici numei khat zong mai sang hong piang tu thute a son khol thei khat hi a, ama thu son khol thute a son babang piang takpi hi ci in a minthang mama khat hi. Ama ii 2007 atu sonkholna Montel William TV ah 2006 December 27 ni in kisuaksak hi. Ama thuson teng sung pan pawl khat kaikhawm leang, 2007 New York khua Tsunami namthuam nasia mama khat om tu, Mexico ngamah meimual lian mama khat puaktham tu, terrorist-te na truck le meileang zangh in America sim tu ci khawng hi a, sonkhol thu 13 son hi. Ahihang ama sonkhol thute khat mama zong hong piang takpi ngawl hi.
Jeane Dixon
1950 kiim zong Jeane Dixon a kici numei khat tubangma minthang mama ngei hi. 1960 US president kitealna a zo pa in kithalup thuak tu hi ci son khol a, 1960 kitealna a zo president J.F Kennedy kikaaplum takpi ahikom, mihing te in lamdang sa in Jean Dixon nasia sa mama ngei hi. Ahihang Ama thusonlkhol ngei theampo en kik siat in hileang, 1960 president kitealna ah Richard Nixon na zo tu ci khawng, 1958 kum sung ngaalpi thumna piangtu ci thu, Soviet te sia thapi tung mihing a pai sak masa ngam hi tu ci thu, 1997 president kitealna George Bush (senior) na Bill Clinton zo tu ci thu, 1997 sung Hollywood actor Alec Baldwin nasia tatak in dam ngawlna nei tu ci thu, 1997 sung vangleang lal in a taak om tu ci thu te khial siat hi.
Lai Thiangtho sung zongah hong pai pheang tu thu a son khol thei prophet tam mama te ii thu le a sonkhol thute kiat hi. Lai Thiangtho thuciam lui sungah TOPA Jesu hong pai natu thu sonkholna mun tam mama ah kimu thei hi. Hi sonkholna te sia Jesu hong suak ma kum za tam mama kum tuul vaal phial lai hun ah a kisonkhol thu ahihi. Hi prophet te ii sonkhol thu te sia khangthak prophet te ii upmawk thu a son uh bang hi ngawl a, Pathian ii a son, a lak thu takpi veu hitana, a son uh babang pian valian ahikom leitungmi te atu tetti pha mama suak hi. Luke 22:37 ah “Banghangziam cile a maan takin kong ci ciang, ‘Ama sia thukham paltan a, a mawte bangin, kithuak sak tu hi,’ ci a Lai Thiangtho sungah kei ii thu a ki at teng tangtung tu hi,” ci hi.” ci in kiat hi. A tel ol tu phen tu hileang “Keima thu a kisonkhol theampo khat zong peal ngawl in taangtung tu hi” a cina hi.
Prophet Micah
Amasa bel Topa Jesu pian ma kum 700 kiim lai prophet Micah ii sonkhol thu ih en tu hi.
“TOPA in, “Bethlehem Ephrathah khua awng, nangma in Judah ngam sungah khuapi nobel khat na hi a, ahizong nang sung pan Israel a uk tu khat ka piang sak tu hi. Ama be le ngui in taangh tawng pek taw kizom hi,” ci hi.” (Micah 5:2)
Prophet Micah na TOPA Jesu pian ma kum 700 lai in a son khol bangma TOPA Jesu sia Bethlehem khua ah suak takpi hi.
Prophet Isaiah
Jesu hong pian ma kum 700 hun in a kiat Isaiah sungah Jesu hong suak ma lampi hong khol tu, mihing te a hanthawn khol tu tuiphum John piang tu ci thu kiat a, piang takpi hi. “Jerusalem mite hanthawn vun. Amate in ngei hial ma thuak zo a, tu in a khialnate kimai sak zo hi ci in son vun. A khialna theampo atu amate a kicingin daan ka pia zo hi,” ci hi. ” (Isaiah 40:2)
Prophet Isaiah ii Topa Jesu thu a sonkholna dang khat zong kimu thei lai hi. “Ama sia nasia tak kivawtsia a, ahihang ki niamkhiakna taw thuak hi; kam khat zongh huthe ngawl hi. Ngaw tu a a kipaipui tuuno khat bang le a mul meet tu a kipaipui tuu khat a haam ngawl bangin, ama in kam khat beak pau ngawl hi.” (Isaiah 53:7) Isaiah ii sonkhol bangma (Matthew 26:62-63) sung sim leang thiampi saangpa in thu a dok ciang Jesu in kam khat zong a huthe ngawl ci thu kimu hi.
Prophet Zachariah
Prophet Zachariah in Jesu hong suak ma kum tam mama hun lai a sonkhol thu sia anuai abang hi. “Lungdam vun, lungdam vun, Zion mite awng! No Jerusalem mite awng, lungdam in au vun! En vun, na kumpipa uh no kungah hong pai hi! Ama in zawna le mualsuana taw hong pai hi. Ahihang kiniamkhiak in laa tungah to hi. Laano, laapui ii a no tungah to hi.” (Zachariah 9:9) Zachariah in Jeruslam khua sung Jesu Laano to in tum tu ahina thu kum tam mama lai in son khol zo hi.
Prophet Zachariah sungah TOPA Jesu dangka 30 taw a kizuakna thu zong sonkhol zo hi. “Amate tungah, “Na uuk takpi uhle ka sep thaman hong pia tavun. Na uuk takpi bua uhle noma tang vun,” ka ci hi. Tua ahikom amate in ka thaman tu in nguntang sawmthum hong pia hi. TOPA in, keima tungah “Tua sumte Biakinn sum kholna ah koi tan hong ci hi. Tua ahikom kei taw kiphu a, tam a sak mama uh sum sawmthum la in Biakinn sum kholna ah ka koi hi.” (Zachariah 11:12-13) Prophet Zachariah dangka 30 taw Jesu a kizuak tu thu a sonkhol zawk kum 500 kiim bang ciang tua thu hong piang takpi hi.
Psalm Late
Psalm Late a kiat hun sia, Lai Thiangtho thiam mipilte in Jesu pian ma kum 1000 kiim, David kumpipa hun hi ci in ciamte hi. Jesu pian ma kum 1000 kiim lai a Psalm Late sungah Jesu sia a nungzui a muan mama khat na langpan tu ci thu kiat khol zo hi. “Ka lawm pha bel, ka muan belte, ka an hong neakpuite ngangawn in kei hong langpan hi.” (Psalm Late 41:9)
Jesu ii khut le piang te thinglaamte tungah thiik taw kikil tu ahina thute, a kivawt siat natu thute le, a puansil a laaksakna tu thute Psalm laiatpa in kum 1000 kiim in na sonkhol zo si hi. “….amate in ka khut le ka peang pan hong laai hi. Ka ngu ka taangte sia lawt siat a, ka ngalte in hong en a hong sal uh hi. Amate in aisaanna taw ka puan hawm uh hi.” (Psalm Late 22:16 – 18)
Topa Jesu hong pian ma kum 1000 lai in a ki sonkhol thu theampo khon siat tu hi leang tam mama om lai hi. Khatpo nipo ii thu sonkhol hong piang takpi hile tuaktha thathong kici thei tu hi. Tam vei tatak a kisonkhol thu tam mama hong piang takpi thong ahiciang hi thute sia uk po at a a tuak tha thathong hi thei ngawl hi. Mihing tam mama na a upmawk a sonkhol thu theampo a vekpi kisi siat in piang takpi ci sia om thei thong tu ziam?
Topa Jesu thu a kisonkhol theampo upmawk thu in a son uh hi a, tuakthak thathong siat hi a ci nuam te sia bangbangpo ahizong Jesu um bua tong a ci mihing hi tu hi. Topa Jesu pian ma kum za tam mama tuul kiim lai a ki sonkhol thu theampo sia a vaang lian bel Pa Pathian ii thulakna taw a kison thu ahihi.
Topa Jesu leitungah hong tuak sukna thu sia mihing te atu a thupi mama, a thupi bel thu khat ahihi. Tua thu in, “Mihing theampo khialna nei siat hi, khialna ii thamanh sia thii-na ahikom mihing theampo thii-na manawt in kipai siat hi, thii-na manawt in a pai mihing theampo thii-na pan suataak kik thei natu lampi khat bekma om hi, tua lampi in eima theampo luang in khat in thii-na hong thuak sak tu kul hi, mihing theampo luang in mihing khat bekma in thii-na thuak sak tu ci sia suak thei ngawl hi, tua ahikom, Pa Pathian in khat bek a nei a it bel a tapa Jesu ei mihing theampo luang in thii-na thuak tu in leitungah hong tuak suksak hi. Tapa Jesu leitung hong tuak suk ni sia Christmas kici hi. Leitung mite ii suaktaakna nga natu Pathian ii hong piak letsong phabel TOPA Jesu hong sua ni ahi hi. Pathian in ei atu a neisun le a nei theampo sungpan a phabel letsong hong pia ahihi.
Lai sim theampo tungah 2016 Christmas thupha le, nopna om tahen.
Merry Christmas to you all…
Thawngno
Joe La Rue ii at The Fulfillment of Prophecy ka doppha hi.
Siyin Bible 